時常遊走於舊區的小混混，沒理由不知道上哪去找間與麥記差不多甚至平過但品味又顯得特別的餐廳。So，一生只想尋找一個肯挨麥記的女人的作者、導演、演員，或者讀完原著看完短片有丁點同感的你我他，其實可以收皮。
就在看完這幾分鐘短片的24小時後，我推開中央飯店的大門。
來之前其實想打退堂鼓，因為有點雨。
「點解好搵唔搵，要搵呢度？麥記都好過佢！起碼光猛乾淨先吖！」
落雨思濕叫位撐住斗零高踭的美人和我來這裡，的確有點兒那個，雖然我再三強調，呢度同我有幾分相似！
「邊忽似？傳菜阿姐定收銀位阿伯？定係得個大婆台雞汁撈飯既電視呀？！」
唔，我就知道你會咁問！係絕對絕對唔會令你失望似呀！
「唔係見你咁恨食，我真係寧願行過一條街食麥記算數！」
Fine fine！
為了盡快安撫美人的焦燥，我極速拍板叫了「東江鹽焗雞」，「梅菜扣肉」，「菠蘿咕嚕肉」。
味味都好佬，無他！
「又係因為似你吖嘛！」
你真係好似呢碟「咕嚕肉」呀sweetheart。
有前有後，該瘦的，絕不會有多一分肥肉，新鮮嫩口，食落卜卜脆，Sweet得嚟，又有啲酸酸地辣辣地，咀落啖啖肉，仲唔會成口粉！
「如果你話我似碟雞我即刻翻檯！」
嘿嘿。Sweetheart！你睇下！皮薄餡靚，油水充足，同你一樣連脾位皮膚都滑滑溜！始終女人都係肥返啲好！
「肥到似碟梅菜扣肉夠未！」
嘩，你嗒真啲件扣肉，肥而不腻，瘦不癡牙，啲梅菜鹹不過份，甜而適中。扣肉梅菜，主閒分明，互不搶鏡，係咪似足你咁知情識趣先！
「哼！俾你過到骨。」
你肯同我嚟呢度，俾足面我啦！所以我成日話，追求你，是我一生人最正確的決定。
「味味都咁好，咁你覺得邊味最好？」
女人！真係好中意叫人做MC題。
「好難答咩？又唔係叫你係Angela同baby之間揀老婆！」
冇錯，係Angela同baby之間揀老婆，一啲都唔難，因為我揀你嘛！可惜，事實告訴我，原來三揀二，都唔係件易事，仲三揀一？結果只會係M姐同雞汁咁咋喎。
「即係點？」
哈哈哈哈！
「你真係唔好激嬲我囉！」
Well，我係講緊，面前三碟靚餸啫！
